Ibinida ng Land Tranportation and Franchising Regulatory Board Region 2 ang kauna-unahang inilunsad na Modernized Public Utility Jeepney sa probinsya ng Cagayan.
Alinsunod pa rin ito sa Public Utility Vehicle Modernization Program ng nasabing ahensya.
Ayon pa sa LTFRB RO2, limang unit ng MPUJ Class 3 ang inilunsad ng Tuao United Builders Transport Cooperative kung saan sa Tuguegarao City-Tuao, Cagayan via Piat ang magiging ruta nito.
Ang naturang modernized jeepney ay mayroong Euro-4 engines, 23-seating capacity, dashcams, CCTV, speed limiters, AFCS o Automatic Fare Collection System at WiFi.
Iginawad din ni Regional Director Edward Cabase sa kooperatiba ang kanilang Notice of Selection.
Ito umano ang kauna-unahang kooperatiba na gagamit ng modernized PUJ sa Cagayan na pormal nang pinayagan upang bumiyahe.
Karagdagang 10 units pa ng Modernized PUJ ang ilulunsad ng TUBTC sa mga susunod na buwan.
