Naka-angkon sang pilas sa sag-ang ang isa ka mister nga nalab-an gamit ang bolo sang hubog sini nga tupad balay matapos nagluntad ang komusyon takna alas 2:00 sang aga, Hunyo 24 sa Brgy. Mangoso, Sigma, Capiz.
Base sa imbistigasyon sang Sigma MPS, ginapahayag nga gingubat sang suspetsado nga si alyas ‘Nyor’ ang bata sang biktima bangud gina-alegar nagsinggit ini bangud sa kagahod sang videokehan, nagpatunga ang mainit nga pagbina-isay sa duha tubtob ginlabo sang suspek ang amay nga si alyas ‘Boy’.
Matapos ang insidente gilayon nga gindala sa hospital ang biktima agud dapatan sang pagbulong samtang nagapadayon naman ang hot pursuit operation sa suspek nga madasig nagpalagyo matapos nakumiter ang krimen.
