LEGAZPI CITY – Inirekomendar kan Mines and Geosciences Bureau (MGB) Bicol na gibuhong ‘no build zone’ an sarong parte sa Brgy. Buraguis kan Legazpi City kun sain nagkaigwa nin landslide kan nakalihis na bulan.
Sa intrevista kan Brigada News FM Legazpi kay Chief Geologist Arlene Dayao, sinabi kaini na ini an nagin findings sa imbestigasyon ninda katakod kan insidente.
Nagkaigwa su boot nin sadit na debris slide sa lugar asin igwa na nin batak na nahiling sa lugar.
Segun pa kay Dayao, nasa high landslide prone area an nasambit na lugar.
Nakapagtao naman sinda nin report sa lokal na gobyerno asin naisumiter na an rekomendasyon huli ta an lugar, nasa laog nin legal easement.
Basado man sa Republic Act No. 1067 o Water code of the Philippines, dapat an mga lugar na 3 meters, 20 meters o 40 meters an distansya hale sa pampang kan sarong salog, dapat magin easement zone, boot sabihon, wara ki istruktura asin warang mga pigtutugdok na harong.
