GIANUNSYO mismo ni Brigada Group of Companies Chairman/CEO Elmer V. Catulpos nga ihatod sa Brigada ang hinabang alang sa mga nabiktima sa pagbaha sa Maguindanao karong adlawng Lunes, Nobyembre 7.
Nasayran nga nanawagan ang Brigada og tabang sa mga nabiktima sa bagyong Paeng pinaagi sa KaBrigada Foundations, Incorporated.
Mahimong cash, goods ug tubig ang ihatag sa gustong makatabang sa mga kababayan nga grabeng gigusbat ang ilang lugar sa bagyo.
Kahibaluan nga tanang Brigada News FM stations nationwide ang nanawagan og tabang alang sa mga biktima sa bagyo ug uban niini nahatod na nila ang ilang tabang.
Ubay ubay na usab nga taga GenSan ang nagpadangat sa ilang tabang, pinansyal, goods, tubig ug uban pa nga maoy ihatod sa Maguindanao, nga labing naapektohan sa bagyo.
Base sa datos nga gipagawas sa gobyerno, anaa sa 156 ka tawo patay sa Bagyong Paeng samtang mokabat sa P4.3 bilyones nga kantidad sa agrikultura ang nadaut.
