Kinumpirma ni PLt. Col Don Dicksie L De Dios, Chief of Police it Malay MPS nga nagsurender eon ro suspek sa pagpamaril sa sangka commissioner sa isla it Boracay.
Sa interview it Brigada News FM Kalibo kay Col. De Dios, ginhayag kara nga nagsurender kaina it agahun ro suspek nga si PSSG Lloyd Reymundo, sa mga otoridad.
Ginhayag man ni De Dios nga padayun ro andang ginahimo nga follow-up ag hot pursuit operation ag sa kamatuoran hay pilang adlaw nga owa sanda it tueog bangud tanan nga lugar nga pwedeng panaguan it suspek hay andang gin-agtunan.
Bukon eang it segun sanda ro nagausoy sa suspek kundi pati man ro Antique PPO tracker team, APPO tracker team ag Regional Office.
Posible segun nga nabatyagan it suspek ro pressure nga maabung nagausoy kana rasun agud magsurender eon lang raya.
Sa makarun nga sa kustodiya eon it mga otoridad ro suspek, masiguro eon ro hustisya hay maitao sa pamilyang naaywan it anang nabiktima.
Maga pangatubang sa kasong Murder ro daywa ka suspek nga sanday Reymundo ag ro nagapabilin nga at-large nga si Mark Perlas.
Matandaan nga binaril-patay ku Nobyembre 16 ro biktimang si Benjie Quiatchon 24yo, sangka commissioner sa isla it Boracay ag pagkanina it sangka sekyu. / ANN DESLENE SALAZAR
