Nag-angkon sang pilas sa kalawasan ang mga sakay sang duha ka motorsiklo matapos nangbunggu-anay sa Brgy. Agtatacay Norte, Sapian, Capiz takna alas 5:57 kahapon sang Miyerkules, Mayo 15.
Ginkilala ang mga biktima kay alyas “James,” 17-anyos, driver sang motorsiklo kag Jinky Ofalla, 47-anyos, manunudlo kag lunsay mga residente sang Brgy. Lonoy.
Samtang ang ginatudlo suspek amo si Marvin Salas, 28-anyos, kaupod ang iya mga backrider nga sanday Jeckly Orario, 34-anyos kag JR Ariñez, 34-anyos, lunsay mga construction worker kag mga residente naman sang Brgy. Poblacion.
Sandig sa imbestigasyon sang Sapian Municipal Police Station, nagsugat-anay ang duha ka motorsiklo sa Agtatacay Norte Road, kun sa diin ang motorsiklo sang suspek ang padulong sa Brgy. Bilao samtang ang motorsiklo sang biktima padulong naman sa Brgy. Lonoy. Pag-abot sa kurbadahon nga karsada, nang-agaw sang linya ang motorsiklo nga ginamaneho sang suspek nga amo ang gintunaan sang aksidente.
Gindala sang Sapian MDRRMO ang mga biktima sa Mambusao District Hospital samtang ang suspek kag mga backrider sini ang gindala naman sa Roxas Memorial Provincial Hospital para sa nagakaigo nga pagbulong.
Sa karon, temporaryo nga naka-kustodiya sa Sapian MPS ang mga motorsiklo para sa nagakaigo nga dispossyon. | Judy Ann Juare