Inanunsyo ng Palasyo na makakatanggap ng mahigit P200,000 na tulong pinansyal ang mga pamilya ng mga napatay na Pilipino sa nagpapatuloy na digmaan ng Israel at Hamas.
Magbibigay ang Overseas Workers Welfare Administration (OWWA) ng P200,000 assistance para sa pamilya ng 3 Pinoy na nasawi sa labanan, at P50,000 naman mula sa Department of Migrant Workers (DMW).
Ayon sa Presidential Communications Office (PCO), inutusan ni Marcos ang mga ahensya na magbigay ng tulong pang-edukasyon sa mga anak ng mga biktima, gayundin ang tulong pangkabuhayan at suportang medikal para sa mga pamilya.
Samantala, inihayag naman ni OWWA Administrator Arnell Ignacio na ang mga pinauwing Pilipino mula sa Israel at Gaza ay makakatanggap ng P10,000 kapag sila’y nakabalik na ng bansa.
