Nagdangat na sa apat ang numero sang Firecrackers/Fireworks-related injuries nga narekord sa probinsya sang Capiz
Base sa record sang Department of Health (DOH) Capiz, humalin Disyembre 21 tubtub Disyembre 27, apat ang nabalhag nga nalukpan sang palupok.
Sa interview sang Brigada News FM kay Mr. Joeffrey Espiritu, tagpamaba sang DOH-Capiz, iya ginpahayag nga ang una nga nabiktima sang palupok amo ang pito katuig nga bata nga lalaki nagikan sa Mambusao.
Natabo ang insidente sa ila balay kag nagamit ini sang Boga. Nag-angkon ini sang pilas sa mata kun sa diin nabulong naman sa Mambusao District Hospital.
Ikaduha nga biktima amo ang 63-anyos nga lalaki nagikan sa banwa sang Dao, nagamit ini sang palupok nga Triangle kag nag-angkon sang pilas sa nawala nga kamot.
Ikatatlo nga biktima amo ang 17-anyos nga lalaki sa Roxas City, kun sa diin nalukpan lamang ini sang palupok kag indi siya ang nagpalupok sang Bamboo Canon. Nag-angkon lamang ini sang gaob sa parte sang iya lawas.
Ang ikaapat amo ang walo katuig nga bata nga lalaki sa Brgy. Banica, Roxas City nga nagpalupok sang Boga kag nag-angkon naman sang pilas sa mata.
Suno kay Espiritu, mas mataas subong ang kaso sang mga nalukpan kun ikumpara sa nakaligad nga tuig nga may yara lamang sang duha ka kaso.
Nagpanugyan man ini sa publiko ukon mga ginikanan nga bantayan gid ang ila mga kabataan kag likawan ang pagamit sang palupok sa pagsugalaw sang bag-ong tuig agud malikawan ang disgrasya. | Judy Ann Juare
