LEGAZPI CITY – Uminabot na sa labi 32,000 o katumbas nin 69% an nairehistro kan Rural Health Unit (RHU) kan Daraga, Albay sa pigkokondusir na Community-based House-to-house Mass Philippine Package for Essential Non-Communicable Diseases Intervention (PhilPEN) Risk Assessment kan Department of Health (DOH) Bicol sa naunambitan na lugar.
Sa intrevista kan Brigada News FM Legazpi kay RHU Daraga head, Dr. Edna Freya Tan, pigsabi ka ini na padagos an saindang pagsasagibo kan nasabing programa, kun kaya huli sa partisipasyon kan mga residente asin barangay officials, matrayumpo nindang nairehistro an labi sa kabanga kan mga residente kan banwaan.
Sa ngunyan, pigmamawot asin plano ninda ngunyan na madugangan pa an mga residente na maa-assess kan programa, kun kaya pig-eengganyar man kan gobyerno-lokal an partisipasyon asin kooperasyon kan mga Darageño.
Mientrastanto, sa naisagibong house-to-house assessment, pigsasabing nasa 24,000 na mga residente na an at risk sa mga non-communicable diseases segun sa opisina.
Kun magigirumduman, kan nakalihis na Marso 1, pinunan kan DOH Bicol an assessment sa rehiyon na may obhetong ma-check asin maasisteran an mga nasa edad 20-pataas sa mga posibleng helang siring kan diabetis, hypertension, heart attack asin iba pa. | REGINA APINADO
