NAKAMUGNA og traffic congestion sa kadalanang sakop sa Olaer Road, Foremost Village, Barangay Apopong, Gensan human masangit ang mga kable sa kuryente sa wheeler truck nga nagresulta sa pagkatumba sa usa ka poste ug 2 ka streetlights sa maong lugar. Nibabag ang kongkretong poste sa dalan rason nga dili makaagi ang tanang klase sa behikulo.
Miresponde ang sakop sa Traffic Enforcement unit Gensan ingon man ang mga sakop sa SOCOTECO II aron nga matangtang sa dalan ang nag babag mga kable sa kuryente ug aron mahipos ang natumba nga mga poste. Tungod sa panghitabo nawad-an usab og kutay sa kuryente ang pipila ka mga residente sa maong lugar. Samtang gipaniguro sa SOCOTECO II nga karong adlawa mubalik ang kuryente sa mga panimalay nga naapektohan sa insidente.
Takda man usab nga mag-atbangay ang drayber sa wheeler truck ug mga personahe sa SOCOTECO II sa buhatan sa TEU-Gensan aron hisgutan ang settlement base sa damyos nga naangkon niini.I MJ Fernandez
