GIPAILAWOM sa ‘drug test’ ang 600 kinatibuk-ang empleyado sa LGU sa Malapatan, Sarangani Province. Matud ni Mayor Jun Sumbo, negatibo ang mga empleyado nga gipailawom sa test pinaagi sa pagsumite og urine sample.
Ang drug test ang gipangunahan sa Municipal Health Office sa pakig-alayon sa Philippine Drug Enforcement Agency (PDEA). Dugang ni Sumbo, regular kining ginahimo sa LGU aron masigurong ‘drug-free’ ang workplace nila.
Sa guidelines nga gipagula sa Civil Service Commission (CSC) atong 2017 ang kinahanglang mahimong drug free workplace. Kung kinsa usab ang magpositibo sa paggamit og gidiling droga sa empleyado sa gobyerno ang ipailawom sa Drug Dependency Examination nga himoon sa Department of Health (DOH).
Gidugang sa mayor nga ugaling dunay nagpositibo sa test, kini ang iyang iterminate sa trabaho ug regular nga empleyado kini ang ipailawom sa rehabilitasyon. Nakalabay’ng bulan, gipailawom usab sa drug test ang mga empleyado sa kasigbit nga munisipalidad nga mao ang Alabel asa usa ka empleyado ang nagpositibo sa paggamit og iligal nga droga. I Richel Gubalani
