-Daina Gerona
KABANKALAN CITY, Negros Occidental — Nakatalana nga mag-abot sa probinsiya sang Negros Occidental sini nga martes ukon myerkules ang grupo sang mga eksperto nga nagikan sa National Crop Protection Center sang University of the Philippines Los Baños.
Katuyu-an sini amo agud sa pagbulig tapna sang padayon nga pagdagsa sang faw armyworms sa mga kahumayan kag katubuhan nga mas lapnagon sa siyam ka Local Government Unit (LGU) kaangay sang Himamaylan, Kabankalan, Murcia, La Castellana, Moises Padilla, Ilog, Cauayan, Isabela, kag Binalbagan.
Suno sa mga katapo sang Department Of Agriculture (DA) nga mabudlay tapnaon ang amo nga sahi sang insekto bangud sa kadasigon sang paglapta sini dala sang kadamu-on sang ila mga itlog.
Ginapatihan ni 5th District Congressman Atty. Dino Yulo nga ang maga-abot sa karon sa probinsiya ang makabulig sang husto agud matapna ini nga mga army worms.
Madumduman nga sang tinalikdan nga semana nag-abot man sa probinsiya ang mga eksperto nga sa Central Mindanao University nga naka-identify nga “faw army worms ang naga-atake sang mga pananum sa probinsiya.
Sa karon, yara na sa kapin 500 ektaryas ang apektado sang kahalitan tuga sang amo nga faw armyworms.*
