NAGA CITY – Hanapin at bigyan ng solusyon ang problema sa kalusugan ng mga ina o nanay na konsideradong underweight at malnourish sa Naga City lalo na kung nagdadalang-tao, dahil makakasama rin ito sa kalusugan ng sanggol na nasa kanilang sinapupunan.
Ito ang isa sa nabigyan ng atensyon sa isinasagawang dalawang araw na Re-Orientation and Enhancement Training ng mga barangay health workers mula sa 27 barangay ng lungsod .
Nakausap naman ng Brigada News FM Naga si Dina Capistrano, BHW ng Barangay Concepcion Grande, at nabanggit niya na muli silang mag-iikot para hanapin ang mga buntis, kabilang na ang mga minor de edad na buntis na rin, bukod pa sa mga batang bansot o stunted.
Pinakabatang buntis sa kanilang barangay ay 15 taong gulang pa lamang, na kailangan ng mas higit na pag-aalaga, sabi pa ni Capistrano.
