LEGAZPI CITY – Pig-iinguwa ngunyan kan Albay Provincial Social Welfare and Development an pagpapakusog kan mga Barangay Violence Against Women Desk para sa mga VAW victim-survivors sa probinsya. Ini an pigheras ni PSWDO head Ma. Vivien Cea sa Brigada News FM Legazpi.
Segun saiya, an Barangay VAW desk, sarong pisikal na pasilidad o opisina na mandatory para sa gabos na mga barangay na nagsisirbi komo frontline service provider para sa mga biktima asin survivor kan manlain-laing klase nin pang-aabuso orog na sa mga kababaihan.
Susog su boot sa Anti-Violence Against Women and their Children Act, an mga biktima kani iyo an mga uminagi sa pisikal, sexual, sikolohikal, economic asin iba pa.
Katakod kaini, pig-aantisiparan man ni Cea na dakol na mga kababaihan an nagaduwa-duwa, nagdududa o natatakot sa VAW desk para naman sa saindang privacy asin security.
Kaya an importanteng feature kan VAW desk, iyo an pagsiyerto sa pinakahalangkaw na lebel nin confidentiality nganing dai makaluwas an anuman na mga impormasyon kan biktima.
Apwera kaini, sinabi niya na dapat magdesignar an barangay ki VAW desk officer na pinagkakatiwalaang may kakayanang magmanehar ki siring na pasilidad.
