KORONADAL CITY- MAKAKATANGGAP ng insentibo ang mga barangay sa South Cotabato na nagging matagumpay sa pagpapatupad ng mga population programs sa kanilang lugar.
Ayon kay Population Program Officer II Joanne Palacio ng Provincial Population Office na layon nito na kilalanin at parangalan ang mga accomplishments ng mga barangay sa pagpapatupad ng mga population programs sa gitna ng banta ng COVID 19.
Sa pamamagitan din nito, mahihikayat ang mga barangay at mga volunteers na ipagpatuloy at paigtingin pa ang mga priority programs ng Provincial Population Office tulad ng responsible parenthood, adolescent family planning at gender and development program.
Inihayag ni Palacio na magbibigay ang provincial government ng P20,000 na incentive sa mananalong barangay sa bawat munisipyo.
Makakatanggap din ng insentibo ang mga barangay population volunteers.
Ito ay ibibigay sa buwan ng Nobyembre kasabay ng isasagawang Population Congress.
