PITO ka mga ahensya sa gobyerno ug siyam ka mga local government units (LGUs) ang nagkahiusa aron sa pagmugna og plano nga makabenepisyo ang mga agrarian reform beneficiary (ARB) members nga apil sa 113 agrarian reform beneficiaries’ organizations (ARBOs) sa Sarangani province ug General Santos City.
Segun ni Mariannie Lauban-Baunto, Director sa Department of Agrarian Reform – Soccsksargen (DAR-12) nakig-partner sila sa Cooperative Development Authority (CDA), Philippine Coconut Authority (PCA), Department of Agriculture (DA), Department of Science and Technology (DOST), Department of Environment and Natural Resources (DENR), ug Department of Trade and Industry (DTI) alang sa maong inisyatibo.
Ang LGU partners, sa laing bahin gilangkuban sa Sarangani provincial government ug mga munisipalidad sa Alabel, Glan, Kiamba, Maasim, Malapatan, Maitum ug Malungon; ug General Santos City.
Ang maong convergence ang alayun sa direktiba ni Pangulong Ferdinand R. Marcos Jr. ngadto ni DAR Secretary Conrado Estrella III nga palambuon ang panginabuhian sa mga mag-uuma sa tibuok nasud.
Matud ni Baunto nga makab-ot kini pinaagi sa paghatag sa mga mag-uuma og support services susama sa farm machinery, farm inputs, agricultural technologies, training ug uban pa.
