LEGAZPI CITY – Kadaklan su boot na prone o madalas na ma-diagnose nin Broken Heart Syndrome iyo an mga babaye, partikularmente an mga menopausal women.
Ini an sinabi ni Dra. Ofelia Samar-Sy, Cardiologist asin Bicol University College of Medicine Dean sa Brigada News FM Legazpi.
Segun saiya, bako ini huli ta dakol na mga babaye an nabibiktima nin heartbreak, kundi an mga menopausal women edad 50 pataaas, wara na nin “estrogen” na sarong protective hormone.
Huli kaini, importante su boot na maaraman an history kan pasyente nganing maaraman an mga precipitating factors.
Tinawan-doon ni Sy, emotional stress an pinakadakulang nakakaapektar digdi, o an matinding kamunduan dara kan depression kawsa kan mga nagagadan na padaba sa buhay, binayaan, may malalang kamatean o anuman na mga sitwasyon na nagdadara nin grabeng kulog asin kamunduan.
Dapat su boot sa mga pasyenteng siring kaini, matutukan asin ma-monitor asin maidara sa doctor orog na kun magpahiling na ki mga sintomas siring kan biglang pagkulog sa daghan, pagkapagal, palpitation asin iba pa.
Mientrastanto, pigsiyerto ni Sy, bako ini arog kan heart attack na dipisil bulungon, kundi igwa ki mga magkakanigong mga intervention digdi psychologically asin emotionally.
