Mapasalamaton ang pamilyang Siawan human nga miduaw sa haya ni Brgy. Kagawad Joel Daguinsal Siawan si Davao City Mayor Sebastian Duterte kagahapong adlawa, Hulyo 6, 2023 sa Sitio Maharlika Brgy. Baganihan, Marilog District.
Sa post ni Michael Siawan, migaan sumala pa ang ilang gibating kasubo gumikan sa brutal nga pagpatay kang kagawad lakip na kang Indigenous People Mandatory Representative (IPMR) Ernesto Linog Matalam human nga mibisita si Mayor Baste.
Nagpasalamat sab kini sa saad sa mayor nga gukdon ang mga mihimo sa krimen ug lakip na sa mga una nang nangamatay nga lider sa tribung Matigsalug.
Samtang, una nang gibutyag sa Davao City Police Office nga ilang mugnaon ang Special Investigation Task Group nga maoy motutok sa dagan sa double muder case sa Sitio Bagong Silang Brgy Baganihan, Marilog District ning syudad.
