Nakipagpulong ngayong araw si Pangulong Ferdinand Marcos Jr. sa mga opisyal ng Department of Trade and Industry (DTI) at sa Department of National Defense (DND) para talakayin ang mga mahahalagang agenda ng pamahalaan sa sektor ng pamumuhunan at pagpapaunlad ng puwersa ng militar sa bansa.
Kabilang sa mga napag-usapan ay ang nakabinbing pag-apruba sa kautusan sa ‘greenlaning’ o pagpapasimple ng proseso sa paglilisensya at pagpapahintulot sa strategic investments sa bansa.
Ito ay iniendorso ng Inter-Agency Investment Promotion Coordination Committee (IIPCC) sa pangunguna ng DTI.
Kaugnay nito, nakatakda si Pangulong Marcos na lagdaan ang Executive Order (EO) para sa naturang programa.
Ayon kay Marcos, malaking bagay ito para sa patuloy na pag-unlad ng business industry sa bansa.
Samantala, pinag-usapan din sa pulong ang 10-point agenda ng DND kabilang ang patuloy na modernisasyon sa Armed Forces of the Philippines at iba pa.
#
