LIBACAO, AKLAN — Sangka sako nga may patay nga eawas it tawo ro nakit-an sa Sitio Agbusay, Brgy. Agmailig banwa it Libacao.
Ginkilaea ro biktimang si Edmond “Choy” Arias, 43yo ag residente it Brgy. Pinonoy sa nasambit nga banwa, samtang ro suspek hay ginkilaeang si Ricky Alegria 21yo ag residente man sa lugar.
Base sa imbestigasyon it Libacao PNP, Huwebes pa it gabii natabo ro pagpatay sa biktima.
Natabo segun ro kremin kat magsubeang ro suspek ag biktima.
Matapos ro pagpatay hay ginhueog it suspek sa bangin ro sako nga may sueod it eawas it biktima.
Boluntaryo man nga nagsurender ro suspek sa otoridad matapos kara nga akuon sa anang tatay ro kremin.
Nakataeana man nga i-inquest ro suspek nga buyot eon makarun it Libacao Municipal Police Station. / ANN DESLENE SALAZAR
