Gibutyag ni Barangay Punta Engaño Councilor Mark Jonas Estardo nga hangtud karon, gi-hunong pa ang operasyon sa pag-guba sa M/V Diamond Highway.
Segun nga pa niya nga nagpatabang naman gani diha sa Barangay ang management sa maong barko aron nga mabalik na ang ilang operasyon tungod kay hangtud karon, wala pa ma libkas ang Cease and Desist Order nga gi isyu ni Lapu-Lapu City Mayor Junard ‘Ahong’ Chan niadtong Enero 31, 2024.
Kini tungod kay taud-taud na usab nga nahunong ang operasyon ug natanggong na ang trabahuon sa mga trabahante.
Dugang ni Estardo nga gisunod man hinuon sa management sa maong barko ang rekomendasyon sa City Health ug City Environment and Natural Resources Office kon CENRO.
Samtang si Dr. Agnes Cecille Realiza, ang pangulo sa City Health Office, mipahayag nga nakakumpleto na ang maong barko sa mga dokumento gipangayo gikan kanila.
Apan mopahigayon usa sila og ocular inspection karong Biyernes aron sa pagsuta kung nasunod ba ang rekomendasyon para sa maong lugar.//
