Nakiisa ro Malay Municipal Police Station Motorcycle Unit sa Municipal Traffic and Regulatory Office, agud pamunuan ro pagpatuman it trapiko ag magbulig sa pagresolba sa pagtaas it numero it vehicular accidents ag traffic congestion sa isla it Boracay.
Sa datus nga gintao ni Malay Chief of Police PLTCOL DON DICKSIE DE DIOS, kapin sa 28 ro nadakpan nga bukon it mga rehistradong behikulo nga ginaeakipan it single motorbikes, topdown ag multicab nga nag eapas sa Mun. Traffic Code ‘Special Permit to Transport Vehicles to Boracay Island.
Suno kay PLTCOL DE DIOS, paga pabaskugon nanda ro traffic operations para malimpyuhan ro mga karsada sa colorum services para makaangkon it madasig nga daeagan it trapiko ro mga motorista.
Ro mga na-impound nga behikulo hay pagadaehon sa mainland Malay ag ro mga tag-ana hay magapangatubang sa penalidad ag multa. / ANN DESLENE SALAZAR
