Pilason ang magpamilya matapos ginaalegar gin-hit and run sang isa ka pick-up truck sa Brgy. Ilaya, Ivisan, Capiz takna alas 6:10 kagab-i sang Dominggo, Disyembre 17.
Ginkilala ang mga biktima nga sanday Alyas Christian, 21-anyos; Alyas Rose, 21-anyos kag wala na ginhingadlan nga duha katuig nga bata lunsay residente sang Brgy. Lonoy, Roxas City.
Sandig sa impormasyon nagikan sa Ivisan Municipal Police Station, samtang ginasubay sang magpamilya ang dalanon halin sa Brgy. Lonoy padulong sa Brgy. Ilaya, Ivisan sakay sa Yamaha nga motorsiklo sang hinali nalang ang mga ini ginbungguan sang pick-up truck.
Bangud sa impact sang pagkabunggo, nag-apok ang magpamilya nga gintunaan sang ila mga kapilasan.
Samtang ang pick-up ang wala gid nagpondo agud balikan ang iya binungguan.
Nahibaluan nga wala sang suksok nga helmet ang mga biktima kag wala man sang suga ang ila motorsiklo nga ginasakyan.
Sa karon, nagapabilin ang mga biktima sa ospital para sa nagakaigo nga pagbulong samtang padayon naman ang imbestigasyon sang mga kapulisan sa nasambit nga insidente. | Judy Ann Juare
