LEGAZPI CITY – Nagpaparahay na ngunyan an mag-ama na lunad nin motorsiklong imbwelto sa aksidente kasabay an sarong truck kasusaro sa Brgy. Ubaliw, Polangui, Albay.
Nangyari an aksidente kan Marso 13 nin maagahon sa nasambit na lugar, kun sain parehong pasisiring sa direksyon pa-Legazpi an duwang behikulo.
Sa intrevista kan Brigada News FM Legazpi kay Polangui EMS Quick Response Tea Supervisor Christopher Encisa, sinabi kaini na base sa footage kan CCTV, naenot an motor, asin pigbalo kan truck na mag-overtake alagad gari igwa ining makakasabatan kaya nagbalik ini sa lane niya, puminihit sa toong parte asin nag-overtake saka na-blind spot an motorsiklo.
Segun saiya, tulos na dinalagan sa ospital an mag-ama na biktima na nagsapar ki injuries sa manlain-laing parte kan lawas partikularmente sa upper extremities.
Maray na sana su boot ta wara nin seryosong tama asin wara ki binawiang buhay sa aksidente.
Tinawan-doon pa kaini, dawa may sulot na helmet an mga biktima, dai man giraray nalikayan an mga laceration sa nagkapirang parte kan saindang pandok.
Nasa kamot naman su boot kan PNP an driver kan truck, asin sinda an masimbag manungod sa disposisyon kaini.
Pagirumdom ni Encisa sa gabos na mag nagda-drive, antes magbiyahe, ugalion i-check an mga lunadan asin tamang ingat sa tinampo.
