Sobra ro kalipay it Grade 4 pupils ni Ma’am Alma Carlos Esto, sangka maestra sa Dalagsaan Integrated School sa banwa it Libacao, matapos kara nga ipabatyag sa anang mga estudyante ro mga unang eksperiensya sa kabuhi it nasambit nga mga unga.
Sa eksklusibong interview it BRIGADA NEWS FM KALIBO kay Ma’am Esto, pila sa ginpa-eksperiensya nana sa tatlo nana ka estudyante hay ro unang makasakay sa motorsiklo o habal-habal; unang makaagto sa banwa it Libacao; unang makakaon it ice cream, ice buko; unang makasakay sa bus/jeep paagto it banwang Kalibo; unang makasakay it tricycle; unang makaagto sa mall ag makasakay it escalator; unang makaagto sa maabung tawo ag unang makakaon sa fast food.
Ginpaabot pa sa Brigada ni Esto nga ana gid nga gintaeana ro anang mid-year bonus sa 3 ka mga unga bangud naeuoy imaw sa mga raya nga owa pa gali nakasamit bisan icecream eon lang.
Ginbakean man nana it bag ong bag, eambong ag sapatos ro mga unga bilang regalo bangud mga honor student ro mga raya.
Bisan ginagipit man segun si Ma’am Esto hay gintao gihapon nana ro anang bonus sa tatlo nana ka estudyante para raya segun ro magtueod kanda nga magtinguha sa pagtuon ag magtapos ro mga raya ag makaangkon it manami nga trabaho ag makaagto sa lugar nga gusto nanda ag makabulig sa andang pamilya. // ANN DESLENE SALAZAR
