LEGAZPI CITY – Abiso na lamang ang hinihintay ng Land Transportation Office (LTO) Bicol mula sa kanilang central office sa pagpapatupad ng regulation para sa mga e-bikes.
Sinabi ni LTO Bicol Regional Director Francisco Ranches, Jr. sa panayam ng Brigada News FM Legazpi, pinag-iisipan ng central office na i-regulate na ang mga e-bikes sa buong bansa kaya’t nagpatawag ng consultation meeting si ASec. Vigor Mendoza noong isang araw.
Ayon sakanya, ang regulasyon ng LTO sa mga e-bikes sa kasalukuyan ay hindi required na irehistro ang mga 25 kph pababa, ngunit hindi sila pinahihintulutang magbiyahe sa mga national roads o highways.
Subalit dahil din sa pagdami ng mga naoobserbahang gumagamit nito sa main road, naisipan umano ng LTO na i-regulate ito.
Kung tuluyan umanong mare-regulate, tiyak na kakailanganin ang tulong ng bawat lokal na pamahalaan sa pamamagitan ng pagpapatupad ng mga ordinansa at paglatag ng mga kaukulang penalidad sa bawat lalabag.
Sa ngayon, naghihintay lamang sila ng mga panukala at abiso kung tuluyan itong ire-regulate sa mga susunod na araw.
Samantala, ayon din kay Ranches, wala pang naire-report sa kanilang tanggapan na mayroong naaksidente sa paggamit ng e-bikes subalit huwag na umanong hintayin na magkaroon pa ng ganitong mga insidente.
