GUSTO sa presidente sa Red Cluster Group sa trisikel sa GenSan nga si Joshue Fernandez nga mapatuman na sa kasamtangang administrasyon ang Local Public Transport Route Plan kun LPTRP.
Sa pagpasa matud pa sa maong ordinansa, 26 ka ruta ang gihimo apan sa miaging administrasyon nahimo na lang nga 14 mao nga giawayan ug gustong ibalik ang kanhing ihap aron nga ang mga natanggong nga transport cooperative ang makabalik sa pag-operate.
Lakip usab nga gustong mapatuman ang hingpit nga implementasyon sa ordinansa nga mopahapsay sa biyahe sa anaa sa red, white ug apple green cluster ug aron nga ang mga trisikel lang nga taga GenSan ang makapamasada sa dakbayan. Samtang sa laing bahin, suportado gihapon sa grupo ni Fernandez ang pagdumala ni Kagawad Dominador Lagare Jr. sa sector sa transportasyon sa GenSan tungod ginapaminawan ang ilang mulo.
