HANGTUD na lang sa bulan sa Hunyo ang Libreng Sakay nga usa ka programa sa nasudnong gobyerno alang sa mga transport sector ilabi na sa mga kooperatiba sa modernong mga pampublikong sakyanan.
Sa kumpermasyon sa manager sa Metro Gensan Transport Cooperative nga si Orly Sabelita nagsugod sila kaniadtong April 17 ug mahuman sila sa June 15 kay 60 days ang mao nga programa.
Matag semana ang release sa bayad sa gobyerno ug matag Lunes ang ilang pag-submit sa ilang requirements sa trip basi sa service plan.
Gidugang ni Sabelita nga sa impormasyon sa tibuok rehiyon 12 sa panahon sa pandemya nikabat sa 2.4 million ka pasahero ang nakabenepisyo sa Libreng Sakay.
Sa ilang bahin sa usa nila ka rota sa wala pa ang Libreng Sakay anaa sa 800-1200 ang pasahero apan sa dihang may libreng sakay niabot sa 5,450 sa usa lang ka adlaw tumbas sa 300-400 porsyento nga usbaw sa pasahero.
Sa personal nga panglantaw ni Sabelita nakatabang ang Libreng Sakay sa ilang pamasada panahon sa pandemya gikan sa phase 1 hangtud phase 3, mas maayo nga programa kaysa paghatag lang og bugas.
Ang nakaayo daw sa mao nga programa kay makasakay ang tawo makaadto sa ilang pa adtuan ug nagalihok gihapon ang ekonomiya.
Magpaabot lang sila kon may pondo pa nga igahin ang bag-ong administrasyon kalabot sa ayuda ngadto sa transport sector nga apektado sa pandemya. I Ver Diazon
