LEGAZPI CITY – Naglalaom an lokal na gobyerno kan Oas na malaganan na man an saindang banwaan ki solar irrigation system.
Ini an hale mismo kay Oas Mayor Domingo Escoto sa sarong pagorolay kaibahan an National Irrigation Administration asin ibang opisyal, kun sain saiyang pigheras na ugwa kaya an saindang munisipyo ki 997 hectares na rain fed na areas o itong mga omahan na nagaasa sana sa uran bilang source ki tubig.
Dugang pa niya, dakula an potential ninda sa produksyon ki bagas huli ta sinda panduwa sa Libon na iyo an number one na pigaapod na rice granary kan Albay, kaya kun mamamaximize man an Oas, makakatabang ini sa pag-abot kan target na rice production.
Presenteng pigpoproblema kan banwaan an limitadong supply ki tubig huli ta an major source kan omahan sa lugar iyo an hale pa sa tulong source sa syudad Ligao durante kaini, naiiro an saindang planting calendar, kaya kun maka-produce man sinda dae na akma sa market huli ta barato na an magigin presyo ta dakol na ki supply o produksyon para sa merkado
Pigheras ni Escoto na ugwa man sindang darakula na salog na pwede pag kuwaan ki supply nin tubig para sa mga omahan, kaya pwedesir man ini malaganan ki solar pump nganing makasabay sinda sa tamang planting season.
