BNFM BICOL—Naglalaom an lokal na gobyerno kan Malilipot, Albay na mapupugulan kan saindang naging lakdang an dagos na pag-ulag kan nagkapira sa saindang mga opisina na nasa laog kan compound kan Our Lady of Mt. Carmel Church.
Ini kasunod kan ipigtulod na expropriation case kan LGU ngani na bakalon na sana an daga na natutugdukan kan mga nasabing opisina matapos na ipag orden kan korte an pagdemolish sa mga nasabing edificio pabor sa apelar kan simbahan.
Sigun ki Alkalde Roli Volante, nasa 2,000 square meter an okupado kan saindang mga opisina kabali an Rural Health Unit (RHU), Lying-in clinic, Office of the Senior Citizen Affairs (OSCA), 4Ps, Day Care Center asin Barangay Hall kan Barangay 5.
Inako kan alkalde na namumundo sinda sa nangyari alagad dae sindang ibang paagi na pwedeng gibuhon kundi an gamiton an poder o power of eminent domain kan estado.
Sa ngunyan kaya suboot, warang daga an LGU na pwedeng paglipatan kan mga apektadong opisina. Hagad kaini na dae na nguna suboot kuta ini paghiruon urog ngunyan na nasa tahaw nin pandemya an gabos kun sain saro sa mga maaapektaran an RHU kan banwaan.
Antes ini, pirang beses na man suboot na pigbalo kan lokal na gobyerno na bakalon o arkilahon na sana sa simbahan an okupadong daga alagad pusog an panindugan kan parokya na bawion ini.
Wara kaya suboot sinda ngunyan na kapot na katibayan na ipigdonar kan parokya sa lokal na gobyerno an daga na pinunan na inokupar kan LGU kan panahon pa kan Marcos regime.###
