Tungod sa giingong kagutom human sa duha ka semana nga pagpangita sa iyang live-in partner, napugos sa pagpang-snatch ang usa ka lalaki pasado alas 2 kaganihang kaadlawon, Mayo 16, 2024 sa Jungera St., Barangay San Antonio, sa dakbayan sa Sugbo.
Kasamtang nabalhog sa Parian Police Station si alyas “Daot”, 29 anyos, residente sa barangay Balud, San Fernando Cebu.
Sa inteview sa Brigada News FM Cebu, duha ka semana na siyang naglaroy laroy sa Sugbo aron pangitaon ang iyang ka-ipon nga matud pa anaa sa Pasil ug aduna nay kaipon nga lain.
Matud pa, grabe ang iyang kaguol tungod kay samtang sila nag-check in, gibiyaan lang siya niini samtang natulog.
Giingong pait ang iyang kasinati-an kay sa kilid sa karsada lang siya matulog samtang wala pa niya napalgan ang iyang kaipon.
Kaganihang kaadlawon, nabiktima ni Alyas Daot ang usa ka estudyante nga taga Barangay Bankal sa dakbayan sa Lapu-Lapu.
Pag-abot sa lugar, kalit lang miduol ang suspek sa biktima diin milabni kini sa iyang cellphone ug pitaka ug maayo na lang naabot ang duha ka mga police nga sakay sa Mobile Patrol hinungdan nga nagukdan ug nadakpan ang suspek.
Na-recover gikan sa dinakpan ang usa ka cellphone ug pitaka nga dunay sulod nga cash. Subay niini, nangayo na ug pasaylo ang suspek sa iyang nabiktima nga matud pa nahimo lang niya kini tungod sa kagutom.///
