Nalapakan sang 10-wheeler truck ang isa ka lalaki matapos nadanlog kag bumunggo ang ginamaneho sini nga motorsiklo takna alas 5:50 sang hapon, Agosto 7 sa Brgy. Bula, Mambusao, Capiz.
Suno kay Police Captain Shany Allanic, hepe sang Mambusao MPS, ginapahayag nga mapadulong kuntani sa Aklan ang truck nga ginamaneho ni Joemer Villanueva, 39-anyos, residente sang Passi City sang hinali lang nadanlog kag bumunggo ang motorsiklo nga ginamaneho ni Jonathan Siera, 25-anyos residente sang Bato-bato, Mambusao kag nalapakan sang karito sang salakyan.
Ginapahayag, yara sa impluwensya sang makahulubog nga ilimnon si Sierra sang matabo ang aksidente kun sa diin sakay sini ang iya backrider nga madasig naman nga nakalumpat. Gilayon nga ginpangat sa ospital si Sierra para dapatan sang nagakaigo nga pagbulong.
Panawagan naman ni Allanic, nga maghalong sa pagmaneho sang salakyan ukon motorsiklo ilabi na kun madanlog ang dalanon. Sa karon, nagapabilin sa paghinakop sang Mambusao PNP ang driver sang truck samtang ginahulat naman ang desisyon sang pamilya. | KMD Gicalde
