Arestado ang isa ka lalaki nga ginaalegar ‘High’ sa iligal nga droga kag nag-eksibisyon sa dalan samtang nagasakay sa motorsiklo sa Sitio Tagudtud, Brgy. Dapdapan, Sapian, Capiz takna alas 6:30 kagab-i sang Sabado, Oktubre 21.
Ginkilala ang nadakpan kay alyas “Toto”, 31-anyos residente sang New Road, Banica, Roxas City.
Sandig sa impormasyon nagikan kay PSSgt Bennie Villasis, imbestigador sang Sapian Municipal Police Station, iya ginpahayag nga madamo sang residente sa Sitio Malamig ang nakakita sa suspetsado nga nagapagiwang-giwang samtang ginamaneho ang motorsiklo kag nagapang-agaw na sang linya sa dalan rason nga ginreport ini sang mga pumuluyo sa kapulisan sa kahadlok nga makabunggo ini sang iban nga tawo.
Suno kay Villasis, gilayon nila nga ginrespondehan ang lugar kag didto naaktuhan nga naga-eksibisyon ang suspetsado sa dalan kag wala sa kaugalingon.
Ginapahayag nga apisar ginasilingan na ini sang kapulisan nga magpundo wala sa gihapon nagapamati ang suspetsado tubtob nga gin-corner na ini kag natigayon nga maaresto.
Narekober sa paghinakop ni alyas Toto ang 1 piece heat sealed transparent plastic sachet sang ginasuspetsahan shabu, 4 pieces of small empty plastic sachet, twenty-eight (28) pieces sang crumpled aluminum foil, 2 pieces improvised lighter, 1 roll aluminum foil, 1 piece lighter, 1 Jansport backpack color blue kag 1 unit color black Suzuki Raider nga motorsiklo.
Dugang pa ni Villasis, gintuad ni alyas Toto nga may ginalantaw siya nga spaceship sa langit rason nga nagatanga-tanga ini samtang nagamaneho.
Sa karon, nagapabilin sa kustodiya sang Sapian PNP ang suspetsado kag natalana nga pasakaan sang nagakaigo nga panumbungon. | Judy Ann Juare
