LEGAZPI CITY – Timbog sa operasyon kan mga operatiba kan PNP an sarong lalaki sa Brgy. Basud, banwaan nin Polangui, Albay.
Binisto an naarestar na suspek na si alyas “Nonog”, sarong street level individual sa nasambit na banwaan.
Pinangenotan kan pinagsarong esfuerso kan Polangui MPS, PIU Albay asin Albay 1st PMFC sa pakikipagtabangan sa PDEA Albay an operasyon na nagresulta sa pagkakaarestar saiya asin pagkakakumpiskar ki maabot sa 35 gramo nin pigtutubudang “marijuana” na nagkakantidad PHP4,200.
Nahahampang an suspek sa kasong pagbalgar sa RA 9165 o an Comprehensive Dangerous Drugs Act of 2002.
Kapot na ini kan mga otoridad para sa magkakanigong disposisyon.
