TANGGALON sa trabaho ug posibleng manubag sa balaod kung mapamatud-an nga trabahante sa Waste Management Office ang grupo sa mga tawo nga nangolekta og kwarta sa mga tindahan sa Doṅa Soledad Brgy. Labangal niadtong Abril 6, kini ang nahimong reaksyon ni Nonoy Pareja ang labaw sa WMO sa Gensan.
Kahibaloan nga midangop sa Brigada ang mga tag-iya sa tindahan human sila gipabayad isip multa nga migamit sila og selopin nga sudlanan sa ilang mga baligya. Ug kalit lang ang nahitabo nga walay gihatag nga abiso ang taga Barangay.
Giangkon ni Pareja nga adunay ordinansa ang lokal nga panggamhanan kalabot sa pagbawal og gamit sa mga selopin ug uban pang plastic material, apan wala nakabutang sa ordinansa nga mangolekta og kwarta kung adunay madakpan nga mogamit.
Isyuhan lang og ticket sa taga WMO ug pahinomdoman ang mga negosyante kung madakpan nga wala misunod sa balaod, apan giklaro sa nasangpit nga opisyal nga gibawal sa ilang opisina ang pagpangolekta. I Enamie Mogpon
