KALIBO, AKLAN — Kwarta, alahas ag pilang gamit ro nakulimbat it manakaw sa sangka baeay sa Purok 5 C. Laserna St., Kalibo, Aklan.
Sa report sa Kalibo PNP it complainant nga si Sheila Mae Fajardo 37yo ag residente sa lugar, napan-uhan eon lang nana kaina it agahun nga nagkalat eon ro anang mga gamit sa kwarto.
Nadiskubrehan man nana nga naduea eon ro anang silver nga singsing, cellphone, charger, 3,000 pesos nga cash ag mga regalo nga nakaputos eon para sa Paskwa.
Samtang, narekober man ro sangka gunting nga posibleng ginamit it suspek sa pagsamad sa pirtahan it baeay it complainant.
Padayun man ro imbestigasyun it Kalibo PNP sa insidente. / ANN DESLENE SALAZAR
