-Reymund Titong
KABANKALAN CITY, Negros Occidental — Naglab-ot sa 4,458 ka mga classrooms sang Department of Education (DepEd) ang kulang sa probinsya sang Negros Occidental para sa school year 2024-2025.
Sa pila na katuig ang naglabay, ang kakulang sang classroom ang mas ginaproblema sang DepEd kag nga ginasunndan sang kulang nga mga manunudlo.
Pahayag ni Lila Arro, DepEd-Bacolod education supervisor, wala sang kakulangan sang mga manunudlo sa pampubliko nga eskwelahan sa elementarya. Samtang, sa high school naman may 163 ka mga manunudlo nga kulang.
Apang, suno kay Arro, Yara na sila sa proseso sa pag-hire sang masobra 150 ka mga dugang nga manunudlo agud nga tapalan ang kakulang sa mga ini sa syudad.
Sa bug-os nga pungsod, may kulang nga 165,444 ka mga classrooms kag para matapalan ang kakulangan nga ini, dapat magpreparar ang gobyerno sang P105 billion kada tuig asta sa 2030.
Sa karun, ang mga rehiyon nga may pinakamataas nga mga kakulangan sang classrooms gikan sa Kinder to Grade 12 amo ang Calabarzon (Region 4A), Metro Manila / National Capital Region, Bangsamoro Autonomous Region in Muslim Mindana, Central Luzon, kag Central Visayas.*
