Ginhabuyan kag ginpalukpan sang granada ang kilid sang balay ni Dumarao Municipal Mayor Mateo Hachuela sa Barangay Poblacion Ilaya, pasado alas 8:00 sang gab-i sadtong tinalikdan nga adlaw sang Sabado.
Ini ang ginkumpirmar ni Police Captain Achilles Fangco Jr., hepe sang Dumarao PNP sang ma-interview sang Brigada News FM Roxas City.
Suno kay Fangco, sang matabo ang paglupok sang granada yara sa sulod sang balay si Mayor Hachuela kaupod ang pamilya sini kun sa diin madasig nga nagpanawag sa mga kapulisan.
Dugang pa sini, sang ila gin-review ang mga CCTV nga nahamtang sa lugar, didto nakita nga may yara sang isa ka motorsiklo nga naglabay kadungan sang paglupok sang bomba sa kilid sang balay sang alkalde nga malapit sa national highway.
Ginpahayag man sini nga ila narekober sa lugar ang ‘debris’ sang isa ka unit sang M67 hand grenade.
Maswerte naman nga wala sang may napilasan ukon nahalitan sa pagsigabong. Sa karon, padayon pa ang imbestigasyon sang mga otoridad sa nasambit nga insidente. | Judy Ann Juare
