GISUGDAN na sa kapulisan ang imbestigasyon ug case build-up sa nahitabong pagpamomba sa usa ka bus sa Tacurong City, Domingo. Kini dungan sa padayong pagkuha sa kapulisan og pamahayag sa mga nakaluwas nga sakay sa unit sa Yellow Bus Line (YBL).
Lakip ang mga nakuhang ebedensiya sa sulod sa bus alang sa pagpangandam sa pagpasaka og kaso. Nakig-alayon na usab ang kapulisan sa kasundalohan sa gihimong pagpanubay sa insidente, butyag ni PCol. Rogelio Raymundo Jr., deputy regional director for operation sa Police Regional Office (PRO-12).
Matud ni Raymundo Jr., nga labaw sa gimugna nga Special Investigation Task Group (SITG) usa sa nakita nilang motibo mao ang pagpangikil. Luyo niini, wala gibutyag sa opisyal ang grupo nga nagpaluyo sa maong insidente.
Apan una nang gibasol sa Joint-Task Force Central sa pagpangatake ang teroristang grupo nga Dawlah Islamiyah. Dugang ni Raymundo, ang maong bus company ang punting sa labing ulahing bomb attacked sa rehiyon. Giangkon usab niini nga gawas sa mibusikad, nakakuha sila og usa pa ka Improvised Explosive Device (IED) ug kini ang ilang gipabusikad. Ang narekober nga bomb fragments ug sa eksplusibong nakuha sa bus ang nagpasabot nga cellphone ang gigamit isip triggering device.
Alas-11:30 sa buntag Domingo, samtang padulong ang bus sa terminal sa Tacurong, mibusikad ang bomba nga nagbilin og usa patay ug 11 samaron. I Richel Gubalani
