CEBU CITY — Mo-renta ang Cebu Provincial Government og generator sets gikan sa private firm nga Dynamic Power aron magpadayon ang suplay sa kuryente sa Malapascua Island.
Sukad niadtong Semana Santa, nasinati sa maong isla sa lungsod sa Daanbantayan ang mga brownout nga nakaapekto sa ekonomiya sa maong tourist destination.
Nakita ni Garcia nga kung mapasagdan man, masakripisyo ang mga nanginabuhi lang sa turismo.
Maong nagkinahanglan og 2-megawatts nga kuryente aron masulbad ang maong problema.
Nag-meeting silang Garcia, Daanbantayan Mayor Sun Shimura, mga kadagkuan sa Department of Energy, Cebeco 2, Power Source Philippines Inc., ug uban pa aron pangitaan og solusyon.
Gikatakdang mopirma silang Garcia sa Power Source Philippines, ang bugtong power provider sa Malapascua aron mapadayon ang suplay sa kuryente sa mga residente ug bisita.
Magtinabangay ang Dynamic Power sa mosunod pang mga adlaw aron mataud ang generator sets sa Daanbantayan.
Kini ang nahimong solusyon ni Garcia human wala man nitubag ang National Power Corporation sa hangyo nga pabutangan og power barge ang isla sa Daanbantayan.//
