Manugbaligya sang karne sa merkado naga-antos bangud sa kakulangan sang suplay sang baboy tuga sang African Swine Fever (ASF) nga nag-igo sa probinsya sang Capiz.
Sa interview sang Brigada News FM Roxas City kay Kapitan Roberto “Ma’aw” Roldan, presidente sang meat section sa Teodoro Arcenas Trade Center, iya ginpahayag nga tuman sila nga naapektuhan bangud wala na sila sang baboy nga makuhaan sa nagkalain-lain nga banwa sa Capiz gani nagabakal nalang sila sa mga kaiping nga probinsya kasubong sang Antique, Guimaras kag Bacolod.
Ini man ang rason kun ngaman nagmahal ang presyo sang karne sang baboy bangud malayo pa ang ila ginakuhaan sang suplay.
Nahibaluan nga yara na sa P350 ang kada kilo sang karne sang baboy kag posible suno diri nga magsaka sa P400 ang kada kilo sa maabot nga bulan sang Disyembre.
Nagapangabay man si Roldan sa mga bumalakal nga kuntani maintindihan sila sa pagpataas sang presyo bangud naga-negosyo lamang ang mga ini. | Judy Ann Juare
