Sa positibong aspeto pa rin tinitingnan ng Malacañang ang mga ulat na paghinto ng ilang mga lokal na pamahalaan ng kanilang covid-19 vaccination program dahil sa kakulangan ng suplay ng mga bakuna.
Ayon kay Presidential Spokesperson Sec. Harry Roque, ibig sabihin nito na mabilis na ang bawat LGU sa kanilang vaccination roll-out o bakunahan.
Dahil dito, sinabi ng opisyal na hindi malayong maabot ang target na 500,000 doses ng bakuna ang ma-administer kada araw sa buong bansa.
Gayunpaman, nakalulungkot naman aniya, dahil habang mas dumarami ang mga Pilipinong nais mabakunahan, saka naman nagkakaroon ng delay sa ilang suplay.
Kaugnay nito, tiniyak naman ng tagapagsalita na darating din ang bulto-bultong suplay ng bakuna sa mga susunod na linggo at buwan.
Mababatid na noong nakaraang linggo ay nakatanggap ang bansa ng mga bakunang gawa ng Sputnik V mula Russia at dumating rin ang donasyong Astrazeneca vaccines ng Japan.
