MUPASAKA og kaso si Marieta Mission, barangay kagawad sa Buayan batok sa ilang kapitan nga si Rogelio Solis tungod sa paghapak kaniya sa baso nga plastic nga may sulod nga tubig ngadto sa iyang mata.
Nagpa-medical examination na si Mission aron nga gamiton sa pagpasang-at og kaso batok kang Solis tungod sa gihimo niini.
Saysay niini nga miadto siya sa balay sa kapitan human wala gipirmahan ang certification sa iyang anak alang sa proof of residency apan didto gisingkahan tungod nganong kaniya magpapirma ug gitudlo didto kang kanhing kapitan Melencia Ortiz hangtud misangko sa paghapak og baso ni Solis kaniya ngadto sa iyang walang mata.
Nagtuo si Mission nga ang bangi sa iyang mipanaw na nga bana ug sa pagkasuod niini kangOrtiz nga may kaso nga gipasaka kang Solis ang hinungdan sa maong insidente.
Gihingusgan ni Mission nga iyang ireklamo sa Ombudsman ug DILG ang naasuyng kapitan aron nga maleksyunan. Abli usab ang Brigada sa tubag ni Kapitan Solis nga una na usab miduso og reklamo sa Lagao Police Station pagkahuman sa insidente ug gipanghimakak nga gisabligan lang niini og tubig ang barangay kagawad.
