DAKO ang pagtuo ni Kagawad Franklin Gacal Jr. nga usa sa rason nganong gipulihan siya isip chairperson sa Committee on Finance sa Sangguniang Panlungsod, tungod sa iyang pagkakutihan sa mga ginaduso nga pondo alang sa syudad.
Atua karon sa Amerika si Gacal aron suportahan ang Pambansang Kamao sa iyang away sa Agosto 21, nagkanayun nga siya lang ang target gayud nga pulihan ug kuhaon ang gihuptang komiteba.
Gipamugos ni Gacal, obligasyon niya nga utingkayon ang mga ginaduso nga budget kung tama o sakto kini sa pagagamitan ug tinuod nga proyekto.
Duda ni Gacal nga ang P1.9 billion nga planong utangon sa syiudad sa Land Bank of the Philippines ang gamiton alang sa eleksyon luyo nga sa nasayran niini gamiton ang P1.2 billion alang sa pagtukod og palengke ug ang P700 million ang ipalit og heavy equipments.
Alang usab kang Kagawad Jose Edmar Yumang gisaluduhan niya si Gacal sa pagkakutihan niini sa mga budget deliberations apan ang mga komiteba sa konseho kinahanglan na nga magunitan sa bag-ong chairman subay usab sa ilang napasa nga internal rules.
Giklaro ni Yumang, usa ka tuig lang ang paghupot sa chairmanship sa komiteba ug milampas na sila ug gihatagan lang og holdover capacity nga usa ka tuig nga mi-expired na usab.
