PAGHATAG nga adunay kalipay inubanan sa gugma ang simbolo sa kapaskuhan alang ni Brigada Elmer V Catulpos. Dungan sa nagkaduol nga pagsaulog sa pasko, mihatag og regalo ang Ama ng Brigada pinaagi sa Kabrigada Foundation ngadto sa St. Vincent Stambi Home for the Aged ug sa St. Agnes Orphanage, alas 2 sa hapon, Sabado, Disyembre 18, 2021.
Sa pagpamulong niini, gitimbiya ni Brigada Catulpos ang mga tigulang ug nakighimamat sa mga bata. Makita sa nawong sa mga tigulang ang dakong kalipay sa gitunol nga mga foodpacks ug wheelchair sa Kabrigada Foundation. Nagpakita usab sa ilang hiyas sa pagsayaw ug pagkanta ang 25 ka mga bata sa Orphanage, nga nakadawat og regalo.
Nagpasalamat si Sister Juliet gikan sa St. Agnes Orphanage nga mihatag og pahalipay ang Brigada sa mga kabataan luyo nga wala nila makauban ang ilang pamilya, apan ilang masinati ang Pasko pinaagi sa mga regalo nga ilang nadawat. I Enamie Mogpon
