Naka-full alert sa karon ang Jamindan Municipal Police Station sa pagbantay sa palibot sang banwa bangud sa nagapadayon nga paghiwat sang Religious and Municipal Fiesta nga nagsugod sang Enero 6 tubtob 20, 2024.
Sa interview sang Brigada News FM Roxas City kay Police Lt. Joebert T De Los Reyes, hepe sang Jamindan MPS, iya ginpahayag nga agud mapabilin ang katawhayan sa banwa, nag-request sila sang bulig sang mga tanod kag iban pa nga force multifliers nga magaupod sa ila sa pagbantay sa nagkalain-lain nga venue sang mga aktibidades nga ginapatigayon.
Suno kay Delos Reyes mas ginpasangkad pagid nila ang pagpatigayon sang checkpoint sa pila ka bahin sang lugar.
Nagapangabay man ini sang mga pumuluyo ilabi na sa mga bisita nga mag-aligmat kag indi magkampante sa palibot agud malikawan nga mabiktima sang anuman nga sahi sang krimen.
Nagpanugyan man si Delos Reyes sa publiko nga gilayon mag-report sa ila talatapan kun may yara sang makita nga makaduluda nga ginahimo sang pila ka indibidwal. | Judy Ann Juare
