-Brigada News Desk
KABANKALAN CITY, Negros Occidental— Pilas sa likod nga lawas ang naagum sang isa ka babayi matapos ginluthang sang iya tupad balay sa Sitio Mambusao, Barangay Tabu, banwa sang Ilog, sang tinalikdan nga Byernes, Hulyo 19.
Ginkilala ang biktima kay Gelly Frandesquer, 39-anyos, kag ang suspetsado naman kay Eliezer Paul Pallares, 35-anyos, mga lunsay residente sang nasambit nga lugar.
Sa imbestigasyon sang Ilog Municipal Police Station, naga-inom sang makahulubog nga ilimnon si Pallares sa ila tupad balay kag sang medyo madamo na ang nainom, nagkadto ini sa puluy-an sang biktima nga may dala nga sulpak kag ginpalupok sang duwa ka beses.
Naigo ang biktima sa likod sini kag gilayon naman nga gindala sa Dr. Lorenzo Zayco District Hospital sa syudad sang Kabankalan, para mahatagan sang nagakaigo nga pagbulong.
Sa karun, nagapadayon pa ang imbestigasyon sa motibo sang pagpangluthang kag yara naman sa establi nga kundisyon ang biktima.*
