-Reymund Titong
KABANKALAN CITY, Negros Occidental — Sa pinakauli nga report sang Negros Occidental Provincial Health Office, nag-guwa nga sang sur nga bahin sang probinsya ang may yara sang pinakamadamo nga kaso sang Dengue.
Suno kay provincial health officer Dr. Girlie Pinongan, nag lab-ot na sa 873 ka kaso sang dengue humalin Enero tubtob Hulyo 13 ang narekord sa probinsya, mas mataas sang 17.79% kun e-kumparar sang tinalikdan nga tuig nga yara lamang sa 742 ka kaso.
Ang banwa sang Hinobaan ang may pinakamadamo nga kaso sang dengue nga lab-ot na sa 102, ginasundan sang Sipalay nga may 96 ka kaso, Cadiz nga may 77, San Carlos nga may 61, banwa sang Cauayan nga may 53 ka kaso, Silay nga may 52 ka kaso, Kabankalan nga may 49 ka kaso, Victorias nga may 39, Talisay nga may 38, kag syudad sang Sagay nga may 37 ka kaso.
Dugang pa ni Pinongan, ang mga kalabanan nga biktima sang masakit ang mga kabataan nga naga-edad isa tubtob 10-anyos.
Suno pa kay Pinongan nga padayon sa giyapon ang pagpatigayon sang awareness campaigns sa mga barangay sa Negros Occidental, agud mabatuan ang pagdamo pa gid sang kaso sang dengue.
Ang dengue ang isa ka balatian nga gakakuha sang tawo pinaagi sa pagpangagat sang mga lamok nga infected sang “dengue virus.”
