Nagdangoy-ngoy nga nangayo ug pasaylo ang inahan sa duha ka mga bata nga sumala pa gipatay sa ilang amahan sulod sa gi-abangan nga balay sa Prk. 11, Brgy. 39-D, Boulevard ning dakbayan sa Davao pasado alas 11 kagahapon sa buntag.
Sa report gikan sa Davao City Police Office (DCPO) naila ang suspek nga si Pajarito Castro Aragon, 56-anyos, sidecar driver, nga taga Astorga Sta.Cruz Davao Del Sur samtang ang mga biktimang mga anak naila nga sila si Jessa May, 9 anyos, ug John Victor, 8 anyos.
Sa pakighinabi sa Brigada News FM-Davao sa inahan sa mga biktima nga si Bername Ganzan Dalangin, 32 anyos, nga daan nang mihulga ang suspek nga patyon niini ang iyang mga anak ug gihimo niya ang tanan aron kuhaon ang mga bata apan wala niini gihatag.
Igo na lamang sa pagmahay ang nahimo ni Mae sa gidangatan sa iyang mga anak Samtang, gi-angkon sab ni Mae nga duna siya’y bag-ong hinigugma nga maoy iyang gisak-an sa Gensan.
Gitataw ni Mae nga laraw nya nga mutrabaho gawas sa nasud ug didto niya gi-proseso sa General Santos City.
Dugang pa niini nga gituyo niya ang pagpost sa social media sa dagway sa iyang uyab sa katuyoan nga maka-move on na ang suspek nga sumala pa niya dili gustong makigbulag.
Dugang pa ni Mae nga dugay na siyang nawad-an ug gugma kang Pajarito tungod daghang butang nga dili sila magkasinabot gawas pa sa iyang taas na nga pangidaron.
Samtang, emosyunal ang mga silingan sa nahitabo ug dili sila katoo nga mahimo kadto sa suspek sanglit pinangga sumala pa niini ang iyang mga anak.
Gikanayon sa wala na nagpaila nga silingan sa suspek nga dako ang pagsalig ni Pajarito sa iyang kaipon nga dili sila biyaan uban ang iyang mga anak bisan paman sa mga balita nga duna kini laing lalaki.
Gitataw sab sa nasampit nga silingan nga kung pinangga pa ni Bername ang iyang mga anak dili niya kini pasagdan, ug iya na kining gikuha sa dihang iyang nasayran nga gibaharan na sa amahan nga iya kining pamatyon.
Wala na say laraw si Mae nga ipailalom sa otopsiya ang mga patay’ng lawas sa bata nga karon gipahiluna na.BNFM-DAVAO
