LEGAZPI CITY – Makalihis na kumpirmaron kan Philippine National Police (PNP) Bicol an pagkagadan kan lider kan Concepcion Criminal Gang na si Gilbert Saysay Concepcion sa engkwentro sa Paranaque City, dai man giraray matatapos an pagsasagibo nin imbestigasyon kan ahensya.
Segun kay PNP Bicol Acting Regional Director PBGen. Andre Perez Dizon, igwa na sindang lead sa mga kairibahan kaini, mantang sigurado man siya na mababawasan na an mga miyembro kan grupo asin pati man an mga gibo kaini.
Nagkapira kaya sa mga krimen na kinaimbweltohan kan grupo iyo an rape, serious illegal detention, murder asin an pagigin utak sa mga personang nawawara.
Marurumduman, nangyari an operasyon alas 6 nin banggi kan nakaaging Miyerkules makalihis ma-monitor si Concepcion sa parte kan Paranaque City.
Mantang seserbihan ki mandahamiento de aresto asin paparani pa sana an mga otoridad, nagpaputok tulos si Concepcion, asin kan malugadan, nagbalo pa ining magdulag alagad nakorner man sana.
Kasarabay sa operasyon an PRO5, NCRPO, Air Force, Philippine Army asin iba pang mga private person.
Sa ngunyan, nasa Manila an bangkay ni Concepcion asin wara pa man ki nagkukuang kapamilya.
